薛家燕今年6月升呢奶奶，佢二仔石耀庭（Jackson）娶咗做教師太太陳素怡（Zoe），家燕姐喺婚宴當晚全程笑不攏嘴。
家燕姐當年母兼父職湊大三名子女，佢當然好恨見到仔女成家立室。如今二子已娶妻，但大女石祐珊同孻女石耀珠仲未出嫁，家燕姐竟然擔心到喺fb出post話要舉行「選婿大會」。
家燕姐噚晚喺FB PO咗大女珊珊張靚相，留言：「最近我一家人為咗我個演唱會，晚晚冇覺好瞓，我個女個眼圈仲越嚟越大，我開始擔心佢會冇時間拍拖，為咗佢嘅終身幸福着想，我決定幫佢搞個『選婿大會』，哈哈，有意者，請PM我！」
一直有指珊珊嘅緋聞男友係王梓軒，之前「偽毒坤」吳業坤又話想追珊珊，依家家燕姐公開招婿，即係王生同吳生都failed啦。
對於家燕姐心急做外母，係咪想佢快啲嫁，珊珊今日回覆：「媽咪不嬲都想，我見到細佬結婚，我都希望搵另一半嘅。之前細佬未結婚前，媽咪成日催我，見我忙幫細佬搞結婚，媽咪先停咗冇催我，近日見到我搞佢演唱會，見我啲『哩啡嘢』，媽咪成日擔心，又講番呢個問題，不過我事業為重，緣份有就有，我知媽咪好心急，呢個係真嘅。」
家燕姐下月初就紅館開騷，佢仲有時間招婿，到底係真宣傳定假選婿？
(Apple daily)
