樂基兒(Gaile)早前宣布懷孕(相關新聞：https://goo.gl/W9AyT1)，預產期喺下年4、5月。佢之前透露過會考慮水中生B～
Gaile今日現身北角出席活動，身穿貼身裙的她腹部明顯隆起。佢宣傳其電子烹飪書：「第一章會係一啲適合大家開Party嘅食物，第二章就係素食，第三章係適合煮俾寵物狗狗嘅。」
除咗烹飪，仲會有瑜珈同美容總共三個項目，佢話：「我好Enjoy喺幕後由構思到製作嘅過程，唔需要每次都出自己個樣上嚟。」
問到懷孕期間飲食習慣有冇唔同咗？佢就話：「我依家好鍾意食芥蘭，其實以前都OK，但依家見到中國芥蘭，覺得口感好好，反而以前鍾意食嘅漢堡包同Pizza，依家食完就好唔舒服。我都係聽自己嘅身體，唔可以再聽自己個腦。」
咁係B仔定B女？Gaile大方宣佈BB性別：「係男仔，啱啱知道結果，同老公都好興奮，同時亦都好擔心，一步一步嚟。（老公鍾意仔？ ）佢就冇所謂，不過我哋覺得囝囝會直接啲，女仔就公主啲。」至於選擇BB喺香港定美國出世？Gaile話仲未決定：「我每年聖誕都會返屋企（美國），到時返到去先至決定。」
對於近日佢IG被網民瘋狂留言追擊，稱「我不能被人玩弄這麽多年感情 不了了之的就離開了」、「這些年的戲弄，給我的結果就是當你懷孕了。」、「你告訴Ian（樂基兒丈夫）是gay，今年8月份你還在戲弄我。」及後留言又悉數刪走。
Gaile就話自己唔識睇中文，根本唔明對方寫乜，亦唔會放喺心上：「其實對我唔係太大影響，因為我都唔識睇中文，所以有時啲八卦雜誌又好，我都係唔識睇，但嗰位網民間中會煩到我啲朋友，我啲朋友識睇中文，會傳短訊畀我。不過我個IG係公開嘅，我覺得網上世界係一個公開平台，大家講咩都控制唔到，所以就算delete幾多次都會返嚟，最緊要唔好太Over，同埋唔需要咁積極去攻擊我，我唔想指名話邊位，希望佢可以做多啲有意義嘅嘢，其實我有時都會take break唔會成日玩IG，有時間不如做吓瑜伽同煮吓嘢食啦。」
(綜合報道)
