幸福人妻陳茵媺（Aimee）同陳豪結婚5年，婚後三年抱三，依然咁恩愛！二人時不時都會喺IG放下閃，曬下同三個仔女嘅溫馨時光，一家五口真係甜到漏！
最近陳豪去咗台灣為無綫劇集《殺手》拍外景，之後Aimee趁有幾日學校假期就帶埋三個小朋友同奶奶（陳豪媽咪）去台灣探班！
呢幾日去咗動物園，又探咗爹哋，行程好豐富～
不過話咁快旅程已經結束，佢哋返咗香港，而陳豪就仲喺台灣。
Aimee昨晚喺IG PO咗張相，張相左邊係Aimee，右邊係陳豪，兩個都戴住黑超。
Aimee以英語留言，大意係話遠距離戀愛真係好困難，雖然佢哋兩公婆只係分隔港台，只係一個鐘左右嘅飛機，唔係真係啲咩遠距離，但佢好佩服嗰啲真正遠距離嘅情人。Aimee仲話倒數緊，期待老公返屋企，講到底，即係又放咗一個好大嘅閃。
有唔少網民都撐Aimee，紛紛叫陳豪快啲返屋企，唔知身在台灣嘅陳豪，睇完有咩感想呢？
(綜合報道/Apple daily)
