大美人李嘉欣（Michele）於08年與中建太子爺許晉亨拉埋天窗，結婚十年依然恩愛如昔。
婚後誕下兒子許建彤(Jayden)，兩公婆都勁錫仔仔！有時都會曬下同仔仔嘅溫馨moment~
佢哋兩個對囝囝嘅學業都相當緊張，細心鋪路為佢考入本地Band 1名牌小學男拔萃，Jayden今年已升讀小二。
嘉欣不時出活動笑言自己因畀唔少心機教Jayden，更笑言禁老公插手教仔，不過亨亨都緊張囝囝成長，好似昨日Jayden讀緊嗰間男拔小學搞嘅Garden Fete開放日，亨亨11點幾就以家長身份做義工，同場仲見到唔少名人包括有周國豐、溫碧霞老公何祖光、DJ泰山等，估計佢哋兒子都喺呢間學校就讀。
平時見亨亨打扮都係公子哥兒，西裝骨骨，昨日佢就換咗藍色男拔活動制服tee、卡其色褲、cap帽波鞋打扮，相當causal，估唔到來自過百億資產嘅許愛周家族嘅佢，做開許家少爺幾十年，呢幾年做咗老竇，湊仔又幾貼地，更融入囝囝嘅學校做義工！
相中見亨亨好有耐性，畀一大班小朋友圍，面帶笑容，似乎好享受做呢份義工。
周小姐就報料佢負責坐喺操場遊戲櫃位賣活動遊戲劵，佢表示：「呢個嘉年華每年都有，學生家長會幫手做義工，許生就係負責幫手賣遊戲獎劵，佢戴咗帽都唔係好認得佢，冇諗過平時見佢咁公子哥兒，都會坐喺操場，見佢真人都係高高瘦瘦，但係冇平時咁靚仔，同埋都無乜人認出係佢，因為行去攤位買飛都係小學生多，不過見佢都做得好投入。」
周小姐就透露每個家長做義工都係大概做一、兩小時，亨亨就做咗大概一個小時義工，就起身走人搵返Jayden，佢話：「見佢個仔大部份時間都係同同學仔玩，好活躍行嚟行去，最後見到佢拎住飲品跟咗許生走，就見唔到有李嘉欣。」
(綜合報道/Apple daily)
