藝人利嘉兒（Lily）、蔣怡、林雅詩、何基佑及太太鍾凱瑩（Charis）到旺角出席孕婦產後護理中心開幕活動。
誕下女兒Karyssa個半月的Lily表示收身情況OK：「數字好驚人，兩星期減咗30磅！我水腫多，生之前對腳腫到行唔到，好似象腿咁，因為BB個頭早咗向下。」她透露產後一天已輕了15磅，現在只差幾磅就回復懷孕前的體重：「呢幾磅係樽頸位，主要喺肚度，要紮肚同做運動先得。」她自認一向怕悶而零運動，又難以找人陪。
提到湊B會瘦，Lily笑言未感受到，因現時仍有陪月幫手：「但佢一放假我就由天堂跌落地獄，仲要畀人『家暴』！雖然囡囡好乖，但佢一喊就亂抓，BB啲指甲好利，我塊面同頸都畀佢抓損過。」至於可有幫女兒沖涼？她表示成功過一次：「佢好歎，好似飲醉酒咁，不過其他都係喊嘅。」她大呻做新手媽媽經常睡眠不足，老公只是做樣幫手：「好似演員咁，人哋準備好佢咪埋位餵奶同陪個女玩，發覺要換片就話要去飲水，男人都係咁，不過見到佢哋父女情深對望好開心。」
另外，懷孕8個月Charis透露最近脊椎有點不適，要靠按摩舒緩。何基佑笑言：「我好想瞓，但佢半夜慘叫，我惟有學按摩幫佢。」
(on.cc)
