早幾年密密北上賺人仔，最近宣布回流香港，重返樂壇及電視圈，相隔近廿年再拍無綫劇集《法證先鋒IV》。
去年與老婆拉埋天窗，傅穎同彭敬慈分別擔任伴娘同伴郎。佢當時仲畀足九億開門利是娶老婆！夫妻二人穩定兼想生B。
但就被發現撇甩老婆，與一位年輕索女密會！兩人先去睇樓，隨後轉戰酒店「開餐」，期間更幫對方撥頭髮及披褸，舉止親暱！
陪睇樓密密斟
穿上型格皮褸的海俊傑在黃埔街頭等人，一會兒後有一名年約廿多歲的索女靠近，身穿露肩衫配短裙晒長腿。他見到靚女即刻四萬咁口，會合後先到地產舖睇樓，企在門口慢慢睇樓盤，其後更入內詢問地產經紀意見，兩人全程有傾有講。現場所見，海俊傑專攻逾千萬元的單位，看來早年在內地賺到一大筆人仔，有意在港買樓置業！
頭貼頭玩自拍
睇完樓盤，兩人轉戰附近酒店開餐，過馬路時海俊傑出手輕扶對方，借機一展紳士風度。High Tea期間，兩人邊食邊傾密偈狀甚Happy，還幾乎頭貼頭睇電話，又齊齊玩溫馨自拍，快將46歲的他跟索女伴完全沒有代溝！
之後，海俊傑再次盡顯細心一面，不但幫索女夾嘢食，見大風吹到對方頭髮亂了，出手幫她撥頭髮。
坐到涼涼哋，他又除下皮褸為對方披上擋風，僅穿短袖衫下乘機大騷麒麟臂，氹到索女勁開心，看來兩人關係似乎非一般朋友咁簡單！
(on.cc)
