樂基兒(Gaile)早前宣布同圈外老公Ian造人成功(相關新聞：https://goo.gl/W9AyT1)，預產期喺下年4、5月。佢日前出席活動時更透露有意水中生B。
佗BB榮升做準媽咪當然係喜事，Gaile呢幾日都喺IG到貼新相(相關新聞：https://goo.gl/dX5pQF)，今日就貼咗一張喺海邊做瑜伽合十嘅新相，更提到呢3個月因為要保守有B消息，皆因老公迷信，而肚皮日漸大，故冇去做瑜伽，以免被朋友問起，o依家佢除咗可以恢復做瑜伽運動，更笑言要去買大碼嘅瑜伽褲，要「Bye bye body for now」。
開心事梗係有唔少Gaile嘅朋友同網友都畀like恭喜佢，但就惹來一名網友留咗超過100條留言「贈興」，指責Gaile戲弄佢多年感情、青春，一直呃佢同老公係gay couple，更話Gaile肚入面BB喺大話中成長，呢個網友不斷狂loop同一番留言，更tag咗香港、大陸唔少傳媒，甚至香港警察嘅Ig，要Gaile公開對質、實行洗版式拍責對方，不過留言過咗幾個鐘頭就全部删走。
呢個網友嘅留言大概如下：
「我不能被人玩弄這麽多年感情 不了了之的就離開了」
「這些年的戲弄 給我的結果就是當你懷孕了 提前告訴我 我可以找到其他更好的是麽 你太殘忍了」
「你告訴ian是gay 今年8月份你還在戲弄我」
「gay cuple foreverbrother 你當著你母親的面前，你敢不敢否認」
「你朋友可以幫你說謊否定你戲弄我感情的事實吧 你內心 你肚子里的孩子 你敢不敢對你肚子里的孩子說謊」
「這些年 我青春 感情 被你戲弄 我知道你懷孕 只是要你給我個解釋 我就離開 你太狠了」
「無數次告訴我ian是gay」
「你孩子從小就在說大話 戲弄別人感情的母親體內成長 你對得起孩子麽」
「我這些年被玩弄感情 你為你肚子里的孩子積德麽？」
「人不報天報 中國有句古話 不做虧心事 不怕鬼敲門 我問心無愧 你敢不敢否定我說的話」
關於呢個網民嘅行為，Gaile就表示：「呢個網友嘅行為自3年前我宣佈同Ian一齊，就開始不斷喺我Ig留言，佢有7個account，用唔同名狂留言，最初留言話我同Ian去咗新加坡秘婚，佢連Ian父母都會鬧埋，通常狂留言幾個鐘，或者一日後又delete晒佢。」Gaile表示呢個網民喺呢3年未有停過滋擾：「佢外型似一個TB，佢試過send佢自殘嘅相畀我，又話要Ian畀20萬佢，就唔會再搞我，我曾經諗過報警，不過知做唔到啲咩，Ian曾經提意話去見佢，瞭解佢有咩嘢可以幫佢，希望佢唔好再留言。」
問到呢個網民嘅滋擾，會唔會影響佢陀B情緒，佢就話：「我老公都笑我，好彩我唔識睇中文，所以會少咗啲驚慌，但有時我都會有少少驚，因為我唔知佢係邊個，同佢諗緊咩，我唔知道一個憤怒嘅人會有咩行為，尤其我依家有咗BB，都會更加驚，希望佢睇到傳媒報導呢件事，會停止呢個行為，或者希望佢家人可以幫下佢。」
(Apple daily)
