胡杏兒日前剛過39歲牛一，佢最近自組工作室有新發展，事業家庭兩得意。
老公李乘德（Philip）又錫到燶，兩公婆日前帶埋啱啱1歲囝囝李奕霆（Brendan）去咗馬爾代夫度假。
杏兒出發時上載一張抱住囝囝Brendan坐飛機相，佢仲話呢次係囝囝第一次坐飛機，當然兩母子都好緊張，梗係要影相留念。Brendan個樣好似少爺仔~
去到馬爾代夫，當然要好好享受陽光與海灘，水天一色。
首次出埠嘅小小Brendan，對新事物都充滿好奇，佢趴喺度假Villa嘅玻璃地板睇魚，全神貫注好得意，杏兒就偷偷拍底咗囝囝呢一幕。
媽咪杏兒難得放假，佢就去做spa叉足電，爸爸Philip就去做gym。
不過其中一張相杏兒驚現粗腰疑似有喜，孕肚不自覺突出。
唔少網民都即刻追問佢係咪有咗，部分網民仲紛紛恭喜佢添！
其實杏兒懷有第一胎時，就喺社交網上載一輯喺馬爾代夫影嘅大肚相報喜。
唔通今次「重施故技」，借今次旅程想又再公佈喜訊！？而且杏兒都避免影正面，相當有可疑！
（綜合報道）
