藝人鄧麗欣（Stephy）穿上Deep V黑色連身裙出席瑞士天梭表全新腕錶發布會，問到有沒有收藏名錶？Stephy表示：「我呢方面好渣，唔識收藏，自己要研究吓，手錶可以戴又靚，仲保值，我開始有興趣。」
至於有沒有跟男友邱勝翊（王子）互送手錶？她說：「佢送首飾比較多，通常手錶我自己睇啱自己買，大家鍾意嘅款未必一樣。（會唔會戴情侶錶？ ）我就少啲，因為男女未必鍾意一樣，自己鍾意女性化啲嘅款式，呢方面難啲情侶款，所以唔會刻意。（你兩個畀人影過着情侶裝上陣，鍾意情侶裝？）哈哈，之後盡量少啲着啦，嗰次係咁啱得咁橋，係幫佢品牌做宣傳，會盡量低調啲，費事大家話甜到有糖尿啦！」
講到他們將度過拍拖後第一個聖誕節，是否已準備禮物給王子？
Stephy笑言：「聖誕節之後又到新年，新年又情人節，生日咁，好傷腦筋，所以係未諗㗎。（咁佢係咪浪漫嘅男仔？）嘩，好似講佢唔浪漫咁，暫時未知，要多啲時間去摸索吓，暫時都見佢有潛質嘅。（佢對你做過咩浪漫事？)今年我生日有驚喜，全部都係佢籌備，我要還番，有來有往，我ok嘅，我要浪漫都可以浪漫，睇吓點選擇，佢4月先生日，可以慢慢諗。」她笑指最好的禮物是兩人可以一同工作。她又透露剛從台灣回港，現時主要兩邊飛，因在當地有生意。
(on.cc)
