電台DJ兼歌手葉文輝（啤梨）上年12月與拍拖4年的圈外女友Michelle拉埋天窗後，下個月就是結婚一周年的日子。
葉太忽然被傳出軌！
但昨晚就有讀者爆料，仲提供一張啤梨太太被一男士搭住膊頭兼頭貼頭的親密合照，以「證」葉太疑「出軌」。
啤梨接受訪問時表示琴晚已經收到風，因為佢唱片公司位同事都透過WhatsApp傳爆料及相畀佢睇，佢話：「我估全港報館、我唱片公司或者電台都收到一樣嘅報料囉。」問到可向太太「問罪」，他又直言有：「唔會懷疑佢，我對太太好有信心，太太睇完張相都要諗一陣先記得番，其實嗰個男仔係佢加拿大啲同學，唔熟嘅，佢記得應該喺2015年時，佢哋喺港鐵撞到，大家同學咪影張相，咁我老婆又係鬼妹仔性格，冇嘢嘅，個男仔過時過節都有send祝福說話畀太太，但我太太太忙都冇覆人哋。（覺得自己比相中男仔靚仔？）哈，如果對方好似吳尊咁，我或者…要照吓鏡先囉，我好放心，我哋晚晚都見到面，我畀好大自由佢，我唔會懷疑佢，只當一則笑料。」
問可會叫太太不要再跟異性影較親密的相？他又話：「佢結婚後都冇㗎。」問他太太傳出緋聞可受困擾？他又話：「冇喎，只記得好好笑，我聽太太講話，其實呢個男同學有位女友，我估呢位男同學嘅女友懷疑佢男友同其他女仔有嘢，所以呢個男同學嘅女性朋友，有啲都受到騷擾，我想講如果呢位女仔覺得感情有問題，我都好同情佢，不過唔好諗太多啦。」
啤梨為力證和太太情沒變，更晒和太太日前到澳洲嘅旅行相，佢說：「我陪太太去澳洲，出席佢嘅蜜友嘅求婚驚喜派對，我哋玩咗幾日，啲風景好靚，（有冇乘機造人？）我太太好鍾意小朋友，但生BB要順其自然。」他又話婚後太太勁旺佢，接多咗好多廣告，又被邀請擔任推動港、韓文化活動嘅表演嘉賓，工作多籮籮。
（綜合報道 / on.cc）
