出名「愛妻」嘅陸永喺太太Reina十月生日時就話去學車同報埋課程學影相，冧到Reina喺社交網即刻同網民分享。
話的起心肝學揸車學影相
當時兩公婆好恩愛，感情升溫！點知…
不過陸永之前喺活動上就透露「都係交吓功課先」氹住老婆先，點知而家真係開咗張「空頭支票」！Reina剛剛喺網上鬧爆陸永「以後大時大節咪再送禮物」，仲嬲到刪埋個放閃Post！
Reina貼一張灰底黑字圖：「十月某個星期六凌晨三點，『你咁夜仲唔瞓聽日點去上九個鐘攝影班？算啦，難得休息，你都係唔好咁早起身喇。』『我都係咁諗！』」Reina仲心灰意冷話不如直接送部相機畀佢，或者考咗車牌同學識影相先當禮物送畀佢會有誠意啲！兼一大堆hashtag「嘥錢學車做乜都唔係為咗pass係為咗畀張收據我睇」、「簡單啲直接啲好」、「我識得自己安排」，真係隔住個Mon佢幾咁火呀！
最後Reina就話代老公送份禮物畀自己就係去西藏，叫佢留喺屋企湊女！網民都留名想睇陸生點拆呢個彈，仲tag埋佢「男人冇用㗎」，睇嚟陸永今次形象盡毀，「呃妻號」先啱！
（ig / 綜合報道 / on.cc）
