徐子淇與李家誠於2006年拉埋天窗，二人婚後育有兩子兩女，有仔又有女，生活幸福美滿！
徐子淇噚晚喺尖沙嘴以智行基金會親善大使身份出席慈善籌款晚會，老公李家誠亦有到場支持，同場仲有鄺文珣、汪詩詩、汪圓圓。
活動中，徐子淇代表智行基金會接受一張88萬元嘅支票。
李家誠拖實太太徐子淇恩愛現身
一直對慈善工作不遺餘力嘅徐子淇，憶述10年前到安徽探訪一個家庭：「好貧窮，耕田都唔可以養活一家人，於是爸爸去賣血，但因為咁而感染愛滋病，成條村都怕咗佢，爸爸受唔住就自殺，留低嘅媽媽又有重病，兩姊弟當年只有10、11歲，今日見番佢哋，我好開心，細佬讀書成績幾好，就嚟考大學，佢希望讀法律，姐姐有咗自己家庭，佢3歲嘅囡囡又係叫子琪，同我好有緣。」徐子淇希望外界唔好對愛滋病有誤解：「有次帶小朋友去參觀一間大學，諗住去canteen食午飯，當時有學生知道佢哋係受愛滋病影響嘅小朋友，跟住就趕佢哋走，但係校長就話唔好趕佢哋走，不過就轉咗用即棄餐具，呢啲都係有少少誤解，其實正常生活係唔會受感染。」徐子淇指屋企有4個小朋友，自己就好似大秘書，安頓好子女同家庭，就會盡量抽時間做慈善工作。
對於早前帶埋3個子女去柬埔寨探訪，由於當地衛生環境欠佳，佢哋返香港之後，都分別感染沙門氏菌及手足口病，徐子淇話：「係呀，當地係比較污糟，因為佢哋排泄，所有嘢都喺同一條河，佢哋又住喺嗰條河，所以係有好多細菌，但係去呢啲地方又唔想呢樣唔掂嗰樣唔掂，你咁樣唔係真係體驗到佢哋嘅生活，所以我又唔覺得大問題，小朋友病吓，返到嚟休息吓，食吓藥都ok，呢個經驗好寶貴，世界上好多嘢，佢哋都未見過，我希望佢哋能夠曠闊視野，其實今晚佢哋都嚟咗幫手做義賣，最細嗰個都有嚟，希望佢唔好搗亂，我叫姐姐拖實佢，希望佢哋由細開始做起，為慈善出分力。」
(apple daily)
