【成功得手勁得戚】湯洛雯喺舊愛羅天宇面前…

藝人黎國輝（阿感）同老婆YoYo尋晚補擺酒，好多圈中人都有去飲，非常熱鬧！

新娘子除咗同班姊妹勁舞娛賓，當然唔少得拋花球環節啦，咁究竟「花」落誰家呢？

就係單身咗成年嘅湯洛雯（靚湯）喇！

兄弟團之一嘅周志文就喺Instagram上載咗段片，當新娘一拋花球時，企喺身後嘅靚湯一個箭步仆出去搶，成功得手嘅佢高舉花球，個樣勁得戚！

之後佢又揸住個花球自拍晒戰績，恨嫁樣出晒嚟！

順帶一提，靚湯舊愛羅天宇都係兄弟嚟，即係佢尋晚都在場，唔知睇住靚湯咁恨嫁有咩感受呢？

(on.cc)