好戥爸爸高興，而家姐又再度懷孕，佢就話好開心，一屋小朋友，好熱鬧！佢都有同坐緊月嘅李美慧分享。。。
前港姐李美慧（Vivi）日前為年長25歲嘅富商老公曾文豪誕下囡囡「小糖心」。
曾文豪二女曾昭亮、名媛張翡萍、鄧愛嘉同李家彤等，噚晚喺銅鑼灣出席Dior Rose des Vents期間限定店開幕活動。
已為一對子女之母嘅昭亮之前喺IG大晒同1歲半囡囡嘅出浴照，記者笑言相當火辣，昭亮笑話：「我覺得好溫馨，平時有時間都會一齊沖涼。」昭亮現時好享受親子樂，問佢湊兩個小朋友會唔會好辛苦？佢就話：「唔會太辛苦，因為有工人，但係精神上就會辛苦，我完全唔係緊張媽咪，只係想佢哋開心，最緊要唔好曳，呢個年紀唔需要太認真。」
佢仲話唔會搵啲「好癲」嘅學校，依家2歲大仔讀緊happy school，希望妹妹都一齊，讀到6歲先再諗升學問題。
提到爸爸曾文豪早前同繼母李美慧再添一女，昭亮就好戥爸爸開心，佢話：「BB好得意，我都冇買禮物，因為好忙。」昭亮同李美慧都有分享湊B經，佢話：「佢仲坐緊月，我上星期先返香港，見過2、3次，都算多㗎嘞。」
佢又話爸爸都好開心，問到自己仔女同妹妹年紀差不多，感覺特別？昭亮就笑話：「少少啦！我哋係modern family。」而佢就話冇聽過爸爸想再生，自己亦暫時唔諗住，不過講到家姐昭怡再度懷孕，昭亮就話好開心，一屋小朋友，好熱鬧。
(Apple daily)
