太陽娛樂揸弗人周焯華（洗米華）同Mandy Lieu爆出婚外情仲有埋兩女一子。
正印陳慧玲（Heidi）幾乎要同佢離婚，不過最後洗米嫂就大以大局為重，二人關係都明顯緩和咗好多。。。
佢哋一家不時都會合體去旅行，好似8月就成家人去咗俄羅斯同大仔周柏豪慶祝生日。
今次就係去日本！
昨日係洗米嫂38歲生日，佢喺IG PO咗張捧住蛋糕嘅慶生相，仲PO咗唔少喺日本玩嘅相，當然唔少得嘅就係細女周善潼嘟哂嘴嘅得意相！
原來洗米華都有份去呢個Trip！
日前(10月26日)佢哋喺東京成田機場被捕獲，當時有洗米華兩公婆啦、大女周梓潼同細女周善潼，仲有周爸爸，還有一名女士等同一行7人。
洗米華就一身運動打扮戴咗黑超，而洗米嫂就一身黑裝短褲打扮，讀者鄭小姐表示：「當時大概晏晝兩點半喺入境大堂見到佢哋，見到洗米嫂就帶住細女過關，當時未見洗米華，去到拎行李位見到佢，佢哋一行人喺澳門搭飛機嚟東京。」
眾人喺行李處聚埋一齊時，鄭小姐就留意洗米華兩公婆有交流傾偈，仲話：「佢哋細女全程活潑，揹住背囊跳跳紮周圍走，大聲講嘢，好興奮。」
洗米華既有正印Heidi，又有為佢生咗兩女一子嘅情人Mandy Lieu。
每逢過年過節都要分身慶祝，不時要去倫敦探Mandy Lieu幾母子，又要陪屋企人去旅行，真係好忙！
(Apple daily)
