終於到佢哋嘅大喜日子喇，新郎先喺半山一間酒店接新娘，之後就去到西港城設宴，筵開21圍！
麥美恩、伍家謙、吳家樂、湯洛雯、劉穎鏇、范振鋒、阿Sa蔡卓妍、阿嬌鍾欣潼同未婚夫賴弘國都有去到，兩個大方合照。
不過訪問嘅時候，老公就冇企埋一齊，問到阿嬌送咗咩，佢就話：「現金就最實際，佢哋兩個都識咗好耐，之前阿感求婚我都有幫手。當時喺小豬嘅演唱會，嗰時小豬都有幫手求婚。」
問到阿嬌嘅婚禮點，佢就話：「搞緊，依家定咗12月18號簽紙，20號就擺酒，好多細節嘢未搞，婚紗、回禮、簽紙場地都未搞掂，但依家有好多姊妹幫手，香港仲有公司同事幫手。」講到有冇同老公鬧交，阿嬌就話上次搞嘅時候已經鬧咗喇。
黎國輝（阿感）同台灣舞蹈員連佳優（YoYo）喺兩年前光棍節結婚，不過因為YoYo太忙關係，兩人一直未有時間擺酒。等咗兩年，呢日終於係佢哋大喜日子喇，昨日阿感先喺半山一間酒店接新娘，之後就去到西港城設宴，筵開21圍。
阿感着上黑色Lace袖西裝襯YoYo露背暗紅長裙，阿感先解釋太太之前忙住做巡迴演出，做完小豬羅志祥，再接力幫阿妹張惠妹，要到呢個時間先得閒：「呢個婚宴，我十個月前一路plan，太太兩個月前先加入，執手尾修改。」
有一班圈中好友做兄弟姊妹！
問到YoYo早上接新娘時感動嗎？佢話YoYo聽得出奶奶致辭時眼濕濕，而阿感家姐喊，就令自己都想喊。阿感就多謝家姐努力學國語，方便大家溝通。阿感話：「原先成個氣氛好開心輕鬆，打算去玩，不過今朝用國語讀愛的宣言好touching，但冇喊。」佢又話過多幾日，太太要返台灣開工，聖誕兩人都會喺台灣過，而長遠就希望留喺香港。
結婚都兩年喇，咁幾時生小朋友呢？阿感話：「我哋習慣係兩年一次喜事，希望兩年後可以生，呢兩年可以養好身子先，最好就龍鳳胎，如果一個，就女好啲。」YoYo就話冇所謂，女仔可以扮到好可愛，男仔就可以好帥。
阿Sa就七點半左右到，佢就話送禮金最實際，佢仲話：「我同阿感識於微時，未入行拍Y2K已經識，佢係一個好好嘅人，睇住佢成家立室好開心。」問到幾時到佢結婚？佢就話：「唔好講呢啲啦！到時係就話你知，總之依家兩個人開心。（下年結？）吓！下年咁突然？總之到時話你知啦！依家未囉！（等男友提出？）呢啲時機到就到，依家未到，留番下回分解！」
(綜合報道)
