上周日係郭富城53歲生日，城城成班好友一齊為佢慶生。
城城同經理人小美分別都有post大合照，其中一張見到城嫂方媛（Moka）企喺佢身邊。
而方媛激罕喺IG PO咗一張佢蹺實城城嘅二人合照放閃，立即吸咗唔少Like！
佢仲首次PO一家三口溫馨合照，網民見到之後都送上祝福！
Moka早前盛傳再度有喜，不過佢同城城一直都冇正面承認或者否認傳聞。
慶祝完城城生日，就到尋日嘅萬聖節。佢今日PO返噚晚去完玩嘅相，見到Moka化身兔女郎去中環蘭桂坊湊熱鬧。
Moka身穿吊帶黑色蓬蓬裙，完美遮住個肚，太黑亦睇唔出到底係條裙向外散開，定係佢真係肚凸凸。佢戴住喱士兔耳仔面紗，竟然仲着住高跟鞋去玩！不過行樓梯時佢都立即換返平底鞋。
佢留言話：「本來研究好化黑天鵝妝，結果沒化出來 所以就變成了這個造型了。」
網民紛紛留言叫Moka要小心啲呀！
另一張就係Moka同狼人嘅合照，呢張相就明顯睇到Moka着住對「斗零㬹」，輕輕扶住狼人隻手，不過會唔會嚇親肚入面個BB㗎？
(綜合報道)
