佢哋結婚三年，話咁快又追第三個，拍得住陳豪同陳茵媺。
佢生完兩個小朋友都可以極速修身，Keep住少女身形超犀利！
之前佗B六個月時影過相，發現佢除咗手腳纖幼之外，就連個肚都一啲都冇凸起！
着住鬆身衫就話可以遮掩吓，但其中一張相佢着住高腰緊身牛仔褲，紅色長䄂上衣仲包咗喺褲入面，完全冇遮掩之下，仍然見唔到已經6個月嘅孕肚，認真厲害！
唔少網民見到之後都好奇問佢個肚去咗邊？仲有唔少人請教佢點樣做先至可以練成「縮肚神功」。
依家佗B八個月，手腳都仲係咁纖幼，着住鬆身衫就連個孕肚都見唔到，真係令唔少媽媽都覺得好羨慕！
呢日隋棠孖老公同埋一對仔女去咗公園玩，老公仲喺社交網甫咗條片，見到隋棠着住鬆身衫配熱褲大騷無敵長腿，佢同囡囡喺草地上邊玩，跑起上嚟仲好敏捷，一啲都唔似大住肚，就連佢老公都忍唔住話：「8 months pregnant but still fast as lightning.（懷孕8個月但係跑得似閃電咁快）」。
片段中囡囡不停追住隋棠跑，期間唔小心跌低咗，不過佢好叻女冇𦧲地喊，隋棠冇急住扶起囡囡，除咗鼓勵佢自己企起身之外，仲教哥哥幫妹妹，唔少網民都讚佢家教做得好。
(綜合報道)
