名模熊黛林（Lynn）今年4月為老公郭可頌誕下一對可愛孖女Kaylor同Lyvia，一家四口幸福美滿～Lynn時不時都會喺社交網曬湊孖女嘅得意相同趣事，張張都勁吸Like！
早前一齊慶祝Lynn38歲生日，Lynn仲約定兩個囡囡每年都要陪伴媽咪過生日，真係超溫馨～
Lynn昨晚出席活動，講到佢呢排經常曬一對萌爆孖女，Lynn就笑笑口咁話：「係呀，佢哋每日都有唔同嘅事發生，所以每日都有影相，今日會叫爸爸、媽媽。（咁快識叫？）其實三、四個月就開始發音，係冇意識嘅，兩個BB又會講BB話，好得意，佢哋成日傾偈，可能兩個互相練習，講得快啲。暫時未打交，推埋佢哋一齊，會錫一啖。」
問到孖女係咪真係會有心靈感應？佢指兩個囡囡都知道對方係同類，現時囡囡亦開始留意家中小狗，咁囡囡會唔會同狗仔玩？Lynn就表示：「有一日隻狗仔突然跳上去錫妹妹一啖，嚇死我，不過佢係冇惡意嘅，只係想錫吓佢，其實狗仔都係我嘅BB。（睇到呢一幕係咪好放心？ ）係呀，狗仔同BB都令我好放心，都好乖。（兩姊妹性格係咪好唔同？）家姐好淡定，咩都望住你先，妹妹就會嘩嘩咁叫，雖然妹妹大隻好多同高家姐好多，但一睇就知邊個係妹妹，因為佢好嗲。」
此外，問到現時是否已幫6個月大的孖女留意學校？Lynn坦言：「睇緊，原來已經遲咗好多，原來佗住嘅時候就要睇定。（諗住報幾多間？ ）唔知，睇老公報幾多間啦，同埋睇吓啲朋友，因為一齊會開心啲。（報十間？）咁多？ 」
至於怕唔怕同郭富城囡囡報讀同一間學校？
Lynn尷尬地笑一笑說：「我冇諗到咁遠，我唔知喎，唔知有咩學校。（名校來來去去得嗰幾間？ ）睇吓有咩學校收啦，始終兩個人同一間係難啲嘅。（係咪揀國際學校？ ）都想係國際學校，因為見到有好多幾歲嘅BB就要補習，好驚佢哋咁細個就咁辛苦，家姐（郭可盈）個女都係讀國際學校，好開心，我都想個女咁開心。（你問咗佢意見？ ）其實一路都有講開，雖然本地學校學中文都好開心，但係都好辛苦，我有少少驚，我壓力重大過BB。（你係緊張媽媽？）暫時未知道，不過都有少少，我買衫都要買兩套，壓力就已經係雙倍，好恐怖，報學校已經好大壓力。」
城城昨晚都有出活動，真係橋～
(綜合報道/on.cc)
