「生煎包王」蕭潤邦（Oscar）和江若琳（Elanne）將於12月23日舉行婚禮。
而今日就進行過大禮儀式，一對新人亦跟足傳統，未有在儀式中岀現，完成後才與家人影合照留念，事後兩人表示：「一個過大禮程序已經複雜到頭暈。」而大禮中，除有大量中、西式禮餅外，還有乳豬、生果、椰子、山珍海味，還有兩對金龍鳳鈪、大豬金牌及金器等。
準新娘Elanne表示：「今次過大禮我哋盡量都跟足傳統，結果攰爆Oscar，每日有好多濕濕碎碎嘢準備，有時我會突然彈起，問佢買咗呢樣、嗰樣未，佢話我終於有一個新娘嘅狀態。」
而Oscar則謂：「傳統嘢我真係乜都唔識，好彩今次搵咗金牌大妗姐麗姐幫手，我每日好似小學生交功課咁，不停WhatsApp佢，我今日買咗咩。到今日過大禮嘅時候，因為傳統新郎哥係唔岀現，所以我只係負責做柴可夫，全靠一班兄弟同麗姐。」
至於問到禮金金額，Oscar則表示心意最重要，而且今日自己是第二次畀禮金，希望未來岳父岳母感受到十足誠意，Oscar：「之前求婚嘅時候，好驚世伯伯母唔嫁個女畀我，所以一求完婚即刻畀禮金，到準備過大禮先知，原來禮金係應該今日先畀，世伯伯母話畀咗唔使再畀，但係我堅持，我希望畀佢哋見到我嘅誠意，相信我一世都會對老婆、對佢哋好。」
(綜合報道 / on.cc)
