藝人馬國明出席圈中好友杜大偉有份投資的火鍋店開幕，馬國明大讚對方犀利，並表示有興趣投資搞生意：「我喺公司做咗咁多年都識啲朋友，有人搞飲食、時裝、酒吧同補習社，演員唔可以做一世，有機會都要向佢哋偷師，但冇諗到做乜，儲吓錢先。我讀書時嘅同學叫我同佢哋一齊搞飲食，不過我當時太忙、有幾個劇喺身，可能將來會入少少股。只係困死一行，外面世界乜都唔識唔係咁好。」
提到日前參加女友黃心穎三家姐在澳洲的婚禮，馬國明稱因為正在拍劇，時間緊迫，連機程只留了三天。被指與心穎很sweet時，他笑言：「咪又係咁，好簡單，只係朋友結婚去觀禮。（網民催你結婚！）個世界好細，原來心穎三家姐係我姪女嘅朋友，我個侄女就快生小朋友去唔到，我代表埋佢去。（心穎話都想快啲結婚。）佢冇同我講，佢話唔好咁快，佢畀我感覺係事業上想再衝吓，係我感覺，佢冇講。」
講到馬國明被拍到幫心穎拎手袋，他坦言心穎不喜歡男友為她拿手袋：「我有時同佢出街，有人搵佢簽名，我咪幫佢攞一陣囉！其實我唔介意攞手袋，我同媽咪出街都會咁做，我聽過有啲人好抗拒拎手袋，覺得好冇出息，但要睇吓個情況，我阿媽去洗手間唔方便，我都會幫佢拎，冇乜所謂。」
問到兩人在澳洲有否趁機秘婚？他叫大家放心：「我一定唔會，一定唔會幾年後畀人發現原來已經結咗婚，結婚係光明正大，點解唔講得要咁秘密？將來結婚會同大家講，我唔需要秘婚，可能有啲人有苦衷唔講得。」
(on.cc)
