歌手陳潔靈下午於牛頭角舉行記者會，交代她與自己演唱會團隊被指侵權及「假冒」一事。事緣去年中旬她認識了一間名為「Art Connect」的公司，並由3位負責人引薦交由「美亞娛樂」承辦在港12場演唱會，當時她與美亞簽約並邀得舞台劇界猛人甄詠蓓擔任演唱會導演。
由於反應不錯，美亞決定將演唱會移師往澳門繼續舉行，不過演唱會創作慨念會略有不同，而甄詠蓓因有工作在上海進行，故同意交由陳潔靈團隊繼續沿用部分意念。其間美亞曾聯絡「Art Connect」幾位負責人，其中兩位回覆表示不會再沾手澳門演唱會的籌辦事宜。
不過自10月開始，陳潔靈及其團隊不斷收到第3位負責人滋擾，並發出律師信警告她侵權及「假冒」。據陳潔靈表示，曾釋出善意相約對方傾談，但不得要領，幾經考慮決定舉行記者會，作出公開澄清。
陳潔靈無奈地說：「我同Art Connect冇簽過合同，商業糾纏係佢哋同美亞之間嘅事，點解要拖我同我嘅團隊落水？再者嗰位負責人用Art Connect名義發律師信畀我，佢係咪可以代表埋其他兩位呢？其他兩位從來冇對我作出過滋擾行為，呢位負責人甚至聯絡我嘅團隊成員，要求佢哋唔好演出，點解要阻礙人工作呢？喺佢畀我嘅短訊入面，曾經話『激怒劇場界』喇，咁演唱會關劇場界乜嘢事呢？據我所知，Art Connect之前從來冇辦過流行演唱會，我希望今次只係誤會。」
陳潔靈最後宣布澳門演唱會準備就緒會如期演出：「可能演出會更加精彩！（擔心對方申請禁制令影響演出？）呢個係美亞嘅問題，喺我立場只可能係其他原因包括打風，演唱會先會取消。」
她又形容自己入行數十年，今次可謂大開眼界：「收到律師信話我『假冒』，我覺得莫名奇妙、愕然同埋好侮辱。我係受害人，作為一個專業藝人，我要悍衛我嘅專業同名聲，咁講法係咪以後我都唔可以再演出《今晚夜》，同唔可以再做陳潔靈呢？我希望其他同業要避免遇到呢啲事情。」她又數度鞠躬，多謝媒體抽空到場採訪。
(on.cc)
