兄弟團包括羅天宇、楊潮凱、周志康、麥秋成、張明偉、翟威廉，溫家偉就同麥美恩、劉佩玥、蔚雨芯、陳婉衡、王子涵做姐妹團。。。
林師傑和歐陽巧瑩（Tammy）拍拖4年一直都超Sweet！去年林師傑向女友求婚成功，佢哋將於11月22日拉埋天窗。
目前忙於籌備婚禮，準人妻Tammy自爆上星期情緒爆煲：「我今日生日，呢段時間真係好感動，喺我心目中，一直覺得自己處理情緒叻過佢，自己一個人生活咁多年，對自己控制情緒好有自信，有信心解決問題。就係因為好有信心，令自己走咗去一個不斷壓抑，情緒爆煲。
上星期情緒崩潰，喺屋企好似喪屍爆喊，將自己唔舒服壓力嗌晒出嚟，嗌到自己喉嚨發炎聲沙，冇諗過自己處理情緒渣過林師傑，佢幫我解決問題，因為我要面，佢真係陪我喊咗成晚，我郁身郁勢爭扎，佢睇住我唔畀我整到自己，佢睇到我瞓着，佢先夠膽瞓，又幫我同屋企人講解決件事，嗰日起身，我收到爹地媽咪message，我真係好感動，自己冇嫁錯人。
本來婚禮搞到半途，成日問自己係咪唔應該搞，咁煩，我哋係咪做錯決定呢？但上星期發現係啱，上天畀機會我哋經歴呢個問題，如果唔係呢件事，我覺得佢渣過我，依家唔係佢冇咗我唔得，係大家冇咗大家唔得，冇話邊個欠邊個，邊個付出多啲，真係感受到真愛！」
昨日被爆一對準新人已經入紙排期註冊，佢哋申報嘅地址仲係一模一樣，明顯已經過緊同居生活。
其實昨日仲係Tammy嘅26歲生日，真係雙喜臨門！Tammy喺ig貼咗一張三年前嘅舊post，話等緊男友買牛扒返嚟一齊慶祝生日，唔經唔覺，佢哋快將踏入人生另一階段，Tammy留言：「噢~原來林先生陪我過第四個生日嚕~時間真係過得快，感恩嘅係……就算世界怎麼變，綿綿千載此心不變#每年一度屋企燭光晚餐。」真係sweet到震呀！
問到Tammy係咪患咗婚前恐懼症？佢回覆傳媒表示：「我唔係婚前恐懼呀！呢個係一直都有嘅問題，只係冇去面對，人生梗有一啲自己未夠膽面對嘅問題，又唔關婚唔婚前事，純粹呢段時間有好多嘢搞，所以呢件事被林師傑發現到，強迫地令我對自己坦白、對佢坦白、對屋企人坦白，解決咗都好，解開心結嘛！」
木偶哥則體貼地表示：「其實呢個關乎成長，家家都有本難唸的經，最主要透過搞結婚呢件事，我做咗佢哋一家人溝通嘅橋樑，依家我享受緊做一個仔、哥、細佬、丈夫，點樣喺舒服底下保障到自己屋企之餘，亦令到佢屋企舒服。」
能夠幫未婚妻解決同家人嘅問題，木偶哥覺得好開心，大晒幸福話佢哋兩個人活緊一條命：「依家自己好有成功感，亦見到Tammy對我越嚟越有信心，係覺得正嘅，覺得好似天跌落嚟可以當被冚，冇乜大壓力，兩個人係活緊一條命，所有嘢係冇問題，係搞得掂！」
木偶哥仲多謝一班圈中好友幫手，兄弟團包括羅天宇、楊潮凱、周志康、麥秋成、張明偉、翟威廉，溫家偉就同麥美恩、劉佩玥、蔚雨芯、陳婉衡、王子涵做姐妹團，伴郎係木偶哥圈外老死Samuel，伴娘係Tam妹妹Bubu。
(Apple daily)
