藝人陳豪今日出發到台灣為無綫劇集《殺手》拍外景，他表示今次會在當地逗留三星期，家中小朋友適逢有幾天學校假期，所以太太陳茵媺稍後會帶三個小朋友到台灣會合他。
昨晚Aimee PO相，原來佢哋一家五口已提早慶祝萬聖節，齊齊着上牛仔打扮，陳豪話：「因為會所有派對。提早都好，我可以一齊參加。個打扮當然係我聰明又有智慧嘅太太諗出嚟，我太忙搞唔到，啲衫好靚，佢搵到五件一模一樣嘅衫。」
另外，有傳茵媺再懷孕，陳豪否認：「啲人恭喜我，我自己都未知。多謝大家，但係大家心急咗。唔會排除再生嘅可能性，但唔會咁快，雖然太太好鍾意小朋友，但依家已經好忙去湊同去教，要遲啲先再生。」
至於有指古天樂及蕭定一公司曾向陳豪招手，他笑言：「唔知有人向我招手，有嘅話好開心。但我已經同無綫續咗約。我同TVB合作關係好好，合作模式好開心，見唔到有轉換環境嘅需要。（公司畀好好條件你？）一直以來好開心。（畀好高自由度接工作？）開心囉！」
陳豪為劇集而要操肌，問他到台灣拍劇美食當前也要忍口，他自言已經習慣：「我唔會視為忍口，無論係為健康定精神狀態，我又鍾意健身，我唔係當短期嘅減肥，而係當長跑咁。」
他笑指自己雖然不用像同劇的黎耀祥一樣除衫騷肌，但自己比對方更有難度：「除衫見肌肉唔難，我要隔住件衫都見到肌肉，咁先難呀！」
(on.cc)
