阿嬌同「醫界王陽明」賴弘國，今年五月喺美國舉行浪漫婚前派對，至於婚禮，阿嬌曾講過今年12月，地點係香港。
依家已經十月底喇，係時候要plan好婚禮細節，兩人日前亦已正式入紙，排期註冊。擬結婚通知書上，阿嬌用本名「鍾嘉勵」，兩人申報嘅地址，男嘅填台灣，女嘅填香港。
阿嬌同賴弘國爆出戀情之初，曾傳女方係大過男嘅四年，亦有傳係九年。擬結婚通知書就提供清晰答案，阿嬌大過賴弘國八年多。賴弘國係1989年5月28日出生，阿嬌就係1981年1月21號。
擬結婚通知書曝光，阿嬌終於鬆一口氣，可以同大家宣佈婚期——分兩日搞呀！佢話：「好開心終於入咗紙，終於可以公佈幾時簽紙，會喺12月18日，咁12月20日就擺酒，好開心終於可以講出嚟。依家婚禮準備得如火如荼，請緊人，其實大部份朋友都會嚟，亦好開心，可以同朋友親戚一齊慶祝重要嘅一日，現在好開心呀，多謝大家！」
賴弘國同阿嬌之前舉行婚前派對時，曾同賴生有一段短暫婚姻嘅「華航林依晨」趙筱葳都有「發功」——晒幸福，貼下同小朋友去英國旅行嘅相；之前爆出賴弘國向阿嬌求婚成功時，趙筱葳都有「贈慶」寫道「幸福會循環，悲傷也會循環，當我們想要自己愛的人快樂平安幸福時，就要在幸福的循環中盡一點心力。」
又真係咁啱得咁橋，呢頭賴生同阿嬌入紙結婚，趙筱葳亦有喺IG貼一輯攝於夏威夷嘅泳衣照，盡現豐滿上圍。
賴弘國同趙筱葳曾喺節目《康熙來了》放閃，二人拍拖2年，於2016年4月結婚，同年10月宣佈離婚。
(Apple daily)
