前港姐張名雅佗緊第二胎，雖然粗身大細，但不時都會一個人出街，早前佢就乘搭港鐵，不過佢喺社交網話冇人讓座：「個肚籮咁大都係冇人會讓位，有人落車我先有得坐。」豈料引起網民熱論，尋晚佢就喺社交網發表「讓座論」回應！
佢話：「敬老扶弱對我來講係基本亦希望盛傳給下一代，好多人有心人會選擇讓座（而你讓座人哋拒絕你又係另一回事），但有小部分人見到老人家、小朋友或大肚婆你真係會擰開望第二邊，時運高睇你唔到，我真係睇過！」佢又話好多網友私訊佢有類似經歷，感同身受嘅佢表示「見到人哋可能有需要但你冇選擇讓座，係唔可以話你錯，因為你絕對有權繼續坐到落車先起身」，最後佢就話如果需要嘅人係你親友或者自己，感受會唔會唔同？
佢仲上載咗張喺港鐵站嘅自拍，就話有小部分人留言問佢點解有車唔揸，鍾意去搭港鐵，又有人問佢點解大肚都要搭，「藝人點解唔用司機或者搭的士」？似乎有啲激氣嘅佢，就話：「我又想講，點解唔可以搭地鐵（港鐵）？作為港人好想出句聲，讓座給有需要嘅人不是必然，讓座是一種美德，是內涵同個人修養。」
（ig / on.cc）
