【被爆佗孖B後】劉詩詩首現身

2018-10-24

31歲大陸女星劉詩詩同大17年嘅吳奇隆結婚3年，早前有指因聚少離多令婚姻亮紅燈，不過兩人即刻公開晒恩愛力破不實傳言。

著曬情侶裝十指緊扣逼地鐵

之前就有傳媒報導指劉詩詩「失蹤」4個月，傳出疑成功佗孖B，已經懷孕3個月嘅消息，但亦有指劉詩詩身處美國做「試管嬰兒」，搞到全身浮腫冇露面。

兩人曾被爆曾秘訪求子聖地。

昨日劉詩詩終於在上海蒲頭，下午着紅色裙襯牛仔褸、腳踏高踭鞋出席品牌記者會。活動現場沒有安排傳媒自由發問同影相，所有問題都要事先交劉詩詩經理人審核過關，結果當然好順利咁「刪除」全部關於大肚嘅問題啦，劉詩詩被問到另一半嘅話題，只係好例牌咁答：「開心的時候、家人相聚時都值得紀念。」

晚上劉詩詩聯同金像影后妮歌潔曼（Nicole Kidman）、超模仙蒂歌羅馥（Cindy Crawford）、巴西名模Alessandra Ambrosio出席品牌盛會，換了紅色外套襯封胸圓領裙，打扮十分密實，相反，其他三位外籍女星則性感低胸裙撐場。不過，劉詩詩就特別開心，因為同台三位女星都係佢嘅偶像。