無綫花旦劉佩玥(Moon)近年備受力捧，喺《幕後玩家》入面表現亮眼，更喺台慶劇《跳躍生命線》首次擔正做女一，成功上位。不過佢日前突然喺社交網透露多次進出醫院，需要入院接受治療，唔少網民見到之後都好關心Moon，仲留言替佢加油。
昨日Moon為劇集《跳躍生命線》宣傳。
劉佩玥喺活動上扮受傷，由馬德鐘（左起）、何廣沛同羅天宇幫佢包紮。
問到淋巴及免疫系統出現問題，佢就話：「最初發現下巴腫咗、有啲突出嚟、仲硬硬哋，於是去睇醫生化驗，睇超聲波見到三個淋巴核脹起咗黐埋一齊，醫生用枝針插入去抽組織化驗，我同醫生講可唔可以抽埋佢出嚟，咁咪冇事囉，當時其實好緊張，諗住講笑等自己輕鬆吓。」
而佢表示等待化驗結果時都擔心到喊，不過好彩嘅係化驗結果為良性：「下巴腫脹已經消咗，但係頸上仲有一粒淋巴腫起咗，醫生叫我多啲休息，但係拍劇時間就控制唔到，不過《救妻同學會》就快拍完，下年先再開《降魔的2》，有時間可以休息吓。」就算忙極都要記得休息多啲呀！
問到緋聞男友周志文有冇關心佢？Moon就立即笑笑口咁話：
「文仔不嬲都好關心我，大家都係朋友，佢除咗短訊、電話，都有直接叫我食嘢要食得清啲，唔好飲咁多珍珠奶茶。（感情跨進一步？）感情不嬲都好嘅。（有冇加分？）都唔使加分，佢不嬲都好好。」
(綜合報道/on.cc)
