31歲前港姐李美慧（Vivi）與年長25歲的百億富商曾文豪於今年7月結婚，同時宣佈佗B。Vivi老公錫到佢燶，為佢喺法國自購的莊園搞海陸空結婚party兼度蜜月，真係Sweet到暈~
Vivi日前已經「卸貨」誕下6磅重愛女，佢喺社交網PO相宣佈喜訊：「我們的小糖心」。不過佢就話未決定好BB叫咩名。
同好多媽媽一樣，Vivi都決定盡量餵人奶，畀BB最好嘅～不過啱啱先升呢做媽媽嘅佢對呢方面唔太熟悉，佢表示已經一早搵定專業催乳師幫手。Vivi繼續話：「感謝主賜給我們一個聽話嘅BB。（對BB有咩期望？）最希望佢以後可以做動物醫生，幫助更多生命。（老公有冇送咩畀你獎勵？）佢嘅陪伴已經係最好嘅獎勵啦！」
提到佢喺社交網發文擔心過咗預產期之後先分娩，Vivi就話：「都係正常作動冇幾耐就生咗，唔算好辛苦。（老公有冇陪住生？有冇剪臍帶？）老公有陪住我，但就好似冇剪臍帶。（你哋有冇感動到喊？）冇喊，我哋都好堅強，老公不停喺旁邊安慰我、不停鼓勵我，見到BB真係好開心！」
不過Vivi竟然話自己會好似《宮心計2深宮計》劇中宮女咁服侍囡囡超搞笑，錫到佢燶！睇嚟小公主都會好似媽媽咁萬千寵愛在一身！
(on.cc)
