藝人陳貝兒主持嘅無綫節目《嫁到這世界邊端2》推出以來收視不錯，當中嘅愛情故事令唔少網民都覺得好感動。
節目終於嚟到尾聲，今個星期貝兒除走訪法羅群島外，更會見證希臘及波蘭兩段童話式戀愛。
來自香港的希臘人妻Stephanie與攝影師老公Konstantionos結婚9年，近兩年半返回希臘定居，不過親人都唔係身邊，佢有時都難免覺得孤寂。。。
貝兒表示：「佢今次想補辦一次希臘式婚禮，請咗我做伴娘之餘，畀我直擊成個婚禮過程，好遺憾係佢媽媽行動不便唔可以出席，兩母女靠video call傾咗一輪之後，新娘忍唔住爆喊！我知道佢哋呢啲遠嫁嘅人妻雖然搵到真愛，但根始終喺香港。（你接受遠距離戀愛？）其實都試過，仲唔止一次添，不過我拍拖會好掛住，日日都想見，所以首選都係香港男士。」
至於波蘭篇女主角嘉瑩與會計部主管老公Peter目前定居格丁尼亞。
原本任職空姐的嘉瑩往意大利工幹期間因一次意外邂逅就認識咗Peter，婚後誕下兩名可愛混血小男孩。
拍攝期間兩個萌爆小朋友常常黐住貝兒，難怪連佢都忍唔住笑笑口話：「我多咗兩個小男友，返到香港都好掛住佢哋，差啲要認埋佢哋做契仔添呀。」
(on.cc)
