29歲嘅黃心穎與馬國明拍拖超過兩年，由了解中進化到了解咗，日前《蘋果》讀者李小姐提供咗一張心穎同馬明喺澳洲墨爾本街頭嘅合照，透露前日(20號)當地時間下午二時左右，見到一身牛仔look嘅馬明一個人揹住兩個袋，其中一個袋就應該係幫心穎BB拎嘅，真係又man又細心。
相片由讀者提供
原來今日係心穎嘅三家姐黃心慧結婚之喜，一家人齊齊飛到澳洲先玩咗幾日，再出席婚宴。心穎昨日於社交網留言﹕「我親愛的三家姐明天要出嫁喇。。。莫名其妙有d （啲）緊張。」
大家姐黃心美今日亦喺ig story貼上一門五美，四姊妹加埋媽咪嘅合照，仲話﹕「噚晚我細妹上頭，我啲眼淚不自覺係咁流。」
四姊妹感情要好！
今朝有接新娘儀式，見心美穿上吊帶裙，拎住兩封「黃」家利是話﹕「我已經準備好細妹同妹夫斟茶俾我喇。」
佢哋仲預備咗wasabi牙膏，新郎哥同兄弟們真係有排受。
心美同心穎在香港時間四時許，亦有上載一對新人嘅婚紗相，心穎仲做姊妹，幫家姐拎裙尾，陪住家姐出嫁。
心穎做姊妹，好靚呀！
(ig / apple daily)
