吳綺莉、王敏奕、林祖輝、楊淇同麥芷誼等，今日喺香港仔石排灣出席ViuTV新劇《理想國》開鏡拜神，故事以十三個單元組成，其中吳綺莉透露已經相隔七年無拍電視劇，今次夥拍林祖輝飾演夫婦，並有一個9歲兒子，佢話：「我接呢套劇係因為個故事好貼地現實，係講小朋友家長因為工作忙，掛住搵食大家缺乏溝通，導致個仔不幸地跳樓自殺，現實中實在有太多呢啲Case發生。」
吳綺莉又表示接拍呢套劇集另一原因係希望帶出凡事要溝通，同要設身處地為小朋友諗嘅訊息俾大家，希望珍惜生命，佢話：「我性格好直接同好急，有時啲嘢諗到就會講，我有社工朋友都叫我要學習下改變，唔好畀自己太大壓力。」
呢種心態轉變有冇改善到你同囡囡卓林嘅關係？佢話：「呢兩年呢每件發生嘅事我都學到好多嘢，正如我性格好急好快，依家要學識改變，凡事停一停諗一諗冷靜啲先至應對。」佢又舉例：「好似我前排拍咗個廣告 啲相出咗，唔知卓林喺邊度睇到啲相後Send Message同我講『You Look Well』，我答番佢『Thank You』。」
吳綺莉表示作為家長要學識同子女互相尊重，佢話：「佢永遠都係我呢一世最好嘅朋友，有時候我唔可以用依家個年紀去諗佢嘅行為，佢成20歲，你諗番自己20歲拍拖時做過嘅嘢，其實真係無得解釋，愛係無得講，所以要學識互相比空間大家。」
佢又表示有睇到報道指卓林喺網上開直播賺錢，佢話淨係睇到標題無深入去睇，對於卓林將自己嘅姓氏改為Zen，佢話：「Zen亦可以解作禪，不過呢啲好少事啫。」
(Apple daily)
