65歲嘅鍾鎮濤入行45年，今年11月將會喺紅館舉行演唱會，近日B哥哥為演唱會四出宣傳，日前佢接受商台節目訪問，提到喺02年宣佈破產，喺嗰4年受盡人情冷暖。
B哥哥喺97年金融風暴後投資失利而欠下2億巨債，結果喺02年宣佈破產，B哥哥喺訪問話：「我覺得喺呢4年裡面，最自豪係應付人哋嘅白眼，尤其係圈內人跟紅頂白，有啲人喺你紅嗰陣對你好，但係失意嘅時候冷嘲熱諷，嗰陣唯一能夠做到嘅係跳出自己嘅身體，用第三者目光去分清楚邊個先係真正嘅朋友。」
經過呢段日子，B哥哥話o依家啲朋友全部都係真正朋友：「我覺得嗰啲曾經對我白眼嘅人係好傻，我又唔會問你借錢，又唔會求你俾嘢我做，後來當我走出低潮後，又有人會突然變臉，對我完全改變態度，我真係睇到好多嘢。」
B哥哥仲話喺最低潮嘅時候，曾經叫范姜返台灣：「嗰陣我知道自己嘅經濟狀況支持唔到，范姜拎私房錢出嚟支持我，但係唔係金錢上嘅問題，而係前路茫茫都唔知點樣行。」
結果喺破產前夕，B哥哥叫佢返台灣：「佢本身條件好好，冇必要同我一齊捱苦，不過佢死都唔肯走，可能係佢前世欠咗我。」
(蘋果日報)
