苟芸慧（苟姑娘）與陸漢洋上月在加拿大秘密註冊「完婚」，二人昨日在上水雙魚河鄉村會補擺兩場婚宴。苟姑娘身穿deep V兼透視大腿的超性感婚紗，榮升索爆人妻。剛為人夫的陸漢洋講到愛的宣言時，眼濕濕表示：「承諾最少愛佢一生一世，會好好照顧佢。」至於造人計劃，苟姑娘更揚言要生夠4個！
現年35歲的苟芸慧，上月18日已與大她十年、拍拖年半的錫礦大王後人陸漢洋在加拿大多倫多神秘註冊，成為「陸太」。一對新人昨日在上水雙魚河鄉村會補擺兩場喜酒，日間接待工作夥伴，晚上就宴請約200名親友。
一對新人傍晚接受傳媒訪問，苟姑娘身穿性感婚紗登場，不只露肩、大騷事業線，大腿位置更是透視，婚紗尾則長達20呎，既性感又華麗。合照時，苟姑娘笑應傳媒要求錫老公面珠，更錫到對方有唇印。當記者要求二人嘴對嘴時，新郎感尷尬，只肯錫老婆手及借位，最後經記者幾度起哄，他終就範與老婆嘴對嘴。
問到去了幾個地方搞婚禮，埋單會否好貴，陸漢洋表示：「唔知道，最緊要去嘅地方有意義。希望呢個環遊世界嘅trip，可以令我哋將咁重要嘅時間記住，或者十周年可以行多一轉。」他又自爆因緊張已有三日失眠。至於婚禮有否激動落淚，苟姑娘表示：「都有，反而佢（陸漢洋）多啲。」在旁的陸漢洋苦笑道：「我就大鑊啲，不過呢啲係開心眼淚。」
提到造人大計，二人表示不會全速造人，新郎哥笑言會是耐力賽，苟姑娘口快快表示：「想生4個，但未必做到，順其自然啦。」苟姑娘是「處女黨」最後一個出嫁，她笑言要改名：「不如將啲名combine，除咗Amazing Esther外，仲有六壯士。」陸漢洋即提議：「不如叫九伴娘、九星伴月。」
最後，問到陸漢洋對苟姑娘愛的宣言時，他即眼濕濕表示：「唔得㗎，我一講嚟料，會喊……多謝太太對我一個幾難頂嘅人，咁包容、支持同體諒，我會盡我一切所能令佢幸福快樂同開心。」他又說：「佢屋企人一定唔捨得，我承諾最少愛佢一生一世，會好好照顧佢。」
此外，在早前的午宴部份，苟姑娘穿白色婚紗，撓住夫婿陸漢洋進行切蛋糕與祝酒儀式，之後她換上一襲黃色晚裝裙，似足《美女與野獸》中的貝兒，她全日亦獲珠寶品牌借出總值1,300萬鑽飾配戴。大會播出上月在多倫多接新娘片段，當時一身紅衫的新郎應姊妹團要求扮王子唱《Beauty and the Beast》，雖然陸漢洋完全跟不到拍子，但就扮唱高音與走音，贏得笑聲與掌聲。之後，一對新人向苟姑娘父母斟茶，苟姑娘媽媽感動落淚，以國語向新郎講：「好好照顧我女兒。」而苟爸爸就表示：「女兒交給你。」
晚上婚禮以「童話」做主題，全晚有唔少浪漫時刻，當關心妍現場唱《美女與野獸》歌曲《Beauty and the Beast》，陸漢洋戴上野獸頭套扮野獸，同苟芸慧上演真人版《美女與野獸》，新郎為冧老婆出盡法寶，果然夠心思！
陸漢洋大唱冧歌《愛不完》後，在台上話：「啲人問我點解52099（苟苟）3334，就係愛你一世唔夠，要愛你三生三世」，在台下的苟姑娘聽到老公愛的宣言，感動到忍唔住頻頻抹眼淚。
相關新聞：
【苟姑娘出嫁 索爆姊妹團有⋯】https://goo.gl/93SFuY
【恭喜陸生陸太！苟芸慧主動錫錫老公】https://goo.gl/W8uPYS
【苟芸慧出嫁 姊妹團都Get Ready啦：Byebye處女黨】https://goo.gl/LzwJFd
【童話式婚禮超浪漫 苟芸慧曬170萬三卡巨鑽】https://goo.gl/X5d6PJ
【拍拖三個月去拜山 當日苟芸慧一口答應令陸漢洋超感動】https://goo.gl/Z17B2d
(綜合報道)
