報道話兩個人經常出雙入對，仲帶埋女友出席喬寶寶大仔婚宴，兩個人唔單止十指緊扣，而且連去洗手間都要一齊，認真Sweet。。。
進軍影圈，黃子華主演嘅《棟篤特工》佢都有份拍。
入行多年嘅趙永洪，好少緋聞，只係舊年6月同無綫《關你家事》嘅臨床心理學家林玥彤傳過緋聞，有報道指林玥彤介入趙永洪同圈外女友之間，不過當日趙永洪否認緋聞，仲話自己冇拖拍。
不過，趙永洪終於有新戀情，對方係大陸女演員郭鑫蕊。今日有報道話趙永洪喺大陸登台時同郭鑫蕊撻着。郭鑫蕊曾經喺大陸拍過《西游伏妖》、電視劇《楚喬傳》及網絡電影《酷跑青春》等等，有「小楊冪」之稱。
報道話女方成日嚟香港搵趙永洪，兩個人經常出雙入對，好似趙永洪早前帶埋女友出席喬寶寶大仔婚宴，兩個人唔單止十指緊扣，而且連去洗手間都要一齊。而噚晚喺金鐘舉行嘅香港演藝界國慶晚宴，趙永洪都有同新女友到場㖭。
《蘋果》今日打畀趙永洪，問到佢同女友點認識，佢話:「舊年喺北京做嘢時識，我哋一齊出席一個電視台晚宴。」咁係咪同女友一見鍾情？趙永洪話：「可以咁講。」
記者話佢女友個樣好細個，趙永洪就話：「佢今年28喇！」雖然郭鑫蕊28歲，但睇相似係20歲出頭，成個細路女好嫩口。咁趙永洪中意郭鑫蕊啲乜？佢就大讚女友：「人品好，好純好真。」有冇結婚打算？趙永洪話：「順其自然啦。」
(Apple Daily)
