「上半年有啲婦女病，纏繞咗好耐，機能亂晒，所以真係冇諗過（懷孕）。依家三年抱兩件嘅事發生喺自己身上，同老公諗咗好耐要唔要，點處理。。。」
昨晚現身中環出席活動，身穿白色裙，著矮踭鞋現身，但尚未見肚。
38歲何嘉莉與前夫育有一子，之後閃嫁飛機師Gerald Sze，上年9月細女出世。
一年之後何嘉莉喺IG宣佈佗第三胎，懷孕四個月。
昨晚她現身中環出席活動分享喜訊，問到今次再度懷孕係咪計劃之內，佢就話：「絕對唔係，一個意外，唔係預期中嘅事，本身諗住一仔一女，兩個都幾好，加上同阿女時間好近，佢九月先啱啱一歲，諗住放多啲時間喺阿女度，點知有咁surprise事發生。」
「上半年有啲婦女病，纏繞咗好耐，機能亂晒，所以真係冇諗過（懷孕）。」佢就話之前用盡方法，努力咗兩年先成功佗女，本來都諗住好難再懷孕：「依家三年抱兩件嘅事發生喺自己身上，同老公諗咗好耐，要唔要，點處理，但係諗下貓貓狗狗都唔會唔要啦！何況自己骨肉，更加冇可能殺死佢。」
但原來屋企人本身唔係好贊成：「因為怕我太攰，啱啱有兩個小朋友，身體啱啱先復完，又有另一個，加上怕財政上負擔，但點都好，最後都係接受嘅，覺得船到橋頭自然直，依家懷孕4個月。」
問到BB性別，何嘉莉表示有照過超聲波，但係BB遮下遮下，所以未確定性別：「希望呢一胎係女啦，雖然以前我係鍾意仔，但係依家有咗嗰女，覺得個女又嗲又安定啲，加上老公鍾意女，嗰女『冧』到嗰老竇。」
咁哥哥知道自己就嚟多一個弟弟或者妹妹有咩反應呢？何嘉莉就話：「其實哥哥（大仔）已知道媽咪又有咗，佢冇乜反應，但佢想要細佬，不過唔係你想要就要，想要細佬就有細佬，同埋就算呢一胎同大仔咁啱玩，有年齡距離。」
(Apple Daily)
