藝人余文樂（樂仔）以代言人身份，於澳門新濠影滙出席全球首個室內全電能特技匯演《狂電派》的記者會，活動後樂仔接受訪問，表示現時較少接拍有危險戲份的戲劇作品，即使有動作場口，劇組人員都會特別照顧他，因為驚演員一受傷就會影響拍攝進度，笑言想拍都冇得拍。
剛成家立室兼生埋囝囝余初見 （Cody）的他，一提起愛子即冧笑，不過他坦言未習慣爸爸這身份，會感到壓力，所有事情都會好緊張，亦有向身邊朋友取經湊B：「佢唔係咁跟姐姐，都會黐我哋多啲，照顧上用嘅時間、心力就攰啲，夜晚嗰Part就全權我哋負責，會一齊瞓，可能休息時間冇咁好。」外出工作會掛住囝囝？他笑言冇咁嚴重。
問到可曾試過換片、餵奶？樂仔搞笑大呻會被人趕走，所以冇份幫手換片：「因為我唔叻，餵奶就係我負責，沖涼都有份幫手嘅，總之娛樂嘅嘢都係我負責，我係娛樂部。」
問到有仔萬事足的樂仔，拍攝時可會變得錫身？他笑笑口說如果要演出都冇辦法，又指最擔心反而是媽媽：「佢一路都唔鍾意我拍危險戲，但真係要做嘅時候都要做。（咁太太呢？）佢就冇話嘅，好少會講，但如果要拍啲危險嘢都會陪我，其實佢今日都有嚟，但如果太遠、太長時間就未必陪。（咁囝囝有跟埋嚟？）佢喺屋企。」續指一家人在香港定居。
講到日前去日本工作時不適入院，樂仔坦言身體變差了很多，可能因最近工作繁忙，搞到身體「出事」：「有各種唔舒服，呢排真係飛得好密，其實咁樣連住飛都好痛苦，我好鍾意做嘢，但身體唔好都幾麻煩。」
(on.cc)
