無綫台慶劇《跳躍生命線》已經播出咗幾集，觀眾評價都相當正面，而每集由劇中演員嘅結尾獨白，往往牽涉到對人生有深刻反思，令網民深受感動！
例如第一集就有Ali李佳芯飾演嘅章蕙芯話：「記得做學生嗰陣，老師問嘅每一個問題都會有一個答案，但到人大咗我先知道，有時問問題，對方唔一定會比答案。我哋唯有自己去尋求，憑住蛛絲馬跡去猜度、去推斷、去大膽假設，最後原來答案就喺眼前。但係有啲事無論你幾聰明、幾努力，你都係冇辦法知道答案。」
而由何廣沛飾演單親家庭長大嘅卓家傑，爸爸好賭成性，經常連累個仔，有次亦因爲要避債被收數佬襲擊，造成背脊深深嘅疤痕。果集卓家傑獨白：「啲人成日話時間會治療一切傷口，其實係錯。有啲傷口，即使時間過咗幾耐亦都冇辦法令佢復原。因為傷口並唔係喺自己度，而係喺在乎你嘅人身上。」
而喺今個星期一播出嗰集就由「陰謀情人」鄭子誠出口，佢溫柔又磁性嘅聲線，讀出發人深省嘅旁白，網民都大讚佢把靚聲真係冇得輸，好似聽緊收音機咁呀！
一直被稱御用奸角嘅鄭子誠，今次佢化身暖男教官邢Sir，又驚喜又充滿新鮮感，好多粉絲見到平日奸到出汁嘅佢原來都宜忠宜奸，戲路好廣；亦有人都稱讚鄭子誠演繹到位，不愧是老戲骨！
經常做開奸角嘅鄭子誠，見親佢出現都覺得有陰謀，但佢今次飾演嚴厲教官，角色十分正氣。
最近See See TVB facebook專頁就上載咗一段由佢配音嘅短片，佢大平反自己唔係「音樂情人」，亦都唔係「陰謀情人」，而係「救護情人」！
佢仲提起網民覺得旁白結尾似大結局：「有時候，你以為廿五集嘅戲可以慢慢追，但諗唔到竟然集集都係大結局！」佢仲話自己今次真係冇陰謀，而係正氣凜然：「有時候，你以為我係奸嘅同時，先發現我其實可以好正氣！」
成段片鄭子誠把聲都係勁正經，但網民都忍唔住笑！佢仲自封「救護情人」：「我係刑峰，又或者你可以叫我做，救護情人！」喺短片最後，鄭子誠擺出招牌眼神，網民始終都覺得佢真係相當有陰謀，超級爆笑呀！
超級靚聲再配上老氣骨演技，一方面令自己成功洗底，同時又可以令成套劇集更引人入勝！唔知大家有無好似我哋咁追看呢？
(綜合報道 / cctvb)
