由關智斌（Kenny）和張致恒（Steven）15年前組成的BOYZ再度「合體」，在九展Star Hall舉行演唱會。
演唱會有上不少「洋蔥」位。當中Steven最感性，他自認當年不聽話，沒有好好做好，但卻獲公司一直包容，他稱BOYZ在英皇15周年時在澳門演出，那次已覺得是BOYZ最後一次演唱，以為自此後解散，亦好失落。而Kenny亦言同樣他那次演出後便開始返內地一個人工作，好多時感覺到已沒人再記得Boyz這個名：「今晚能見到咁多人仲記得BOYZ，將我哋Unbox咁攞番出嚟，係好多謝你哋！」
而Steven稱當年做了很多事令大家失望，在旁的Kenny即搭他膊頭安慰他，Steven哽咽說：「多謝你咁多年嚟支持我，喺我好窮時候你會借錢畀我，同多謝老闆冇放棄我畀機會我，所以前嗰幾日我瞞住你去做一件事。」
原來Steven去紋身，將「Boyz」這個名紋在胸口上，他謂：「呢個係想對自己一個警剔，因為若我傷害自己，即係傷害咗我拍檔，所以嚟緊日子就好似我送畀你呢首個一樣《我長大了》。」而Kenny在台上邊聽Steven唱亦邊落淚。至於Kenny亦專登戴上當年Steven送給他的鑽石耳環，他稱當年雖然口說「細到風吹得起」，其實他一直好好收藏着。
BOYZ 在台上多謝各人的幫忙，而每次Kenny說到多謝時，台下歌迷都未停過大叫「張敬軒」，原來軒仔在這次BOYZ演唱會是「幕後重要功臣」，由開騷一刻早已低調地坐在控制台上指揮。
先是Steven說:「我好認真想多謝一個人，呢個人喺出道已經識佢，係呢段時間佢教識我哋好多，尤其是如果冇佢都唔會有呢個騷！」全場歌迷已經起哄，Kenny亦眼濕濕開腔說：「呢個人好緊要，佢喺呢個騷幫到我哋好多，今晚佢坐喺Panel位到，做一個特別嘉賓，做一個特別顧問，多謝你張敬軒，演唱會顧問。」
在控制台上的軒仔終除下黑口罩，在全場呼叫聲中，軒仔更做出飛吻手勢，之後被邀上台，軒仔和Kenny和Steven先後「抱抱」。
歌迷熱烈支持下上台！
軒仔謂：「我今晚冇預上台，所以着到似街坊咁。我係好少會喺果個位（控制台）度出現同參與，我啱啱都喊到咩咁，好多回憶同埋好開心咁多朋友嚟支持你兩個。我哋係同年新人，咁好多大家睇睇埋埋嘅新聞都知，唔講喇！好開心可以見到呢兩位同我一齊長大嘅人，可以再次將佢哋放低好耐嘅夢想，因早幾年佢哋都離開咗歌手嘅位置，去其他方向發展，但相信佢哋過去嘅辛苦同經歷，都因為有大家而一筆勾銷。」Kenny再次多謝軒仔，稱多謝當年送了一首好好聽的歌《預言書》給他，之後三人首次在台上一齊出唱這首歌。
(on.cc)
