明顯見肚的Grace在媽媽陪伴下，現身九龍城海味店，見兩母女與店員拿着一塊很大的花膠研究。據店員稱這塊巨型花膠很矜貴，賣4萬多元，其膠質勁多，最啱孕婦坐月時煲湯飲用，聲稱連肚紋都冇，張母愛女心切，當然不手軟，重搥買花膠給Grace補身。之後兩母女再轉睇BB用品，見她選嬰兒衫顏色為藍色和黃色來推算，看來腹中塊肉為男胎，她再睇BB床和手推車，為迎接新生命做好全面準備。
試下BB車先~
兩母女研究緊BB衫嘅質地。 
事後Grace接受訪問，她坦言承認已有喜5個月：「係呀！好想同人講呢件開心事，但又驚唔穩，不過，依家都5個月，害喜情況亦冇咁嚴重，之前又嘔又腰痛，成日要瞓喺床，依家好好多啦，所以出得街！（男定女？）你估吓？我想保持神秘，醫生都叫我做多啲運動，健康最重要！媽咪緊張我，所以嗰日帶我買花膠補身。（你準備順產？）係呀！醫生話我高大，盆骨夠大，應該夠生，老公都係咁諗，唔想我開刀，無啦啦多個傷口！（老公錫晒你？）佢係好錫我，我係坐唔定嘅人，之前諗住Honeymoon去歐洲玩，點知起程前有咗，但日日瞓喺屋企好悶，早排老公出去應酬，我只係等佢返嚟，情緒好忟憎，有發佢脾氣，但老公明白大肚婆情緒問題，所以好體諒，遲啲佢會陪我去旅行，冇得Honeymoon咪Babymoon囉，揀個近啲地方，醫生都話得！」
睇巨型4萬蚊花膠！
女星張珮汶（前名張家瑩，Grace）貴為2007年亞姐冠軍，今年4月和圈外男友何駿杰於州際酒店低調擺婚宴後，一心諗住不設防，生一仔一女，湊成「好」字便相夫教子，做幸福少奶奶！
而Grace這個心願終於在婚後實現，但Timing令她冇得出去玩。原來夫婦二人準備啟程度蜜月前，Grace驗出有孕，當時她的害喜情況嚴重，不時嘔吐和疲倦，需要卧床休息冇得出去玩，她一度向老公撒嬌「發老脾」。直至最近5個月身孕，她在醫生檢驗後覺得胎兒穩定，日前便被傳媒拍到出動Shopping。
(on.cc)
