應采兒同陳小春嘅5歲囝囝Jasper精乖可愛，自從拍完大陸綜藝節目《爸爸去哪兒》第5季後人氣爆燈，噚日應采兒在社交網晒囝囝新相，踢爆囝囝被嫌棄嘅瘀事，留言：「被嫌棄的Jasper！尷尬而不失禮帽（貌）的微笑……」
原來應采兒帶Jasper參加其他小朋友嘅生日會，重遇相識多年嘅關穎，做咗人妻嘅關穎帶3歲愛女朱古力（C.C.）出席，兩位小朋友影合照，點知朱古力擺出一面嫌棄樣，似乎唔係好喜歡Jasper，耷低頭嘴扁扁兼眼泛淚光，另一張相仲斜睥唔肯望Jasper一眼，而Jasper就雙手插口露出迷人微笑，十分搞笑。
應采兒抵死寫道：「居然在小朋友生日會碰到大概十年沒見的關穎～ 三個孩子的媽、真的是太偉大了！為你拍手鼓掌！P.S我知道Jasper不是你女兒喜歡的type，看看我兒子那尷尬而不失禮帽（貌）的微笑，哈哈哈哈哈！」
42歲台灣女星關穎於5年前嫁給香港CEO朱志威，育有3歲女兒CC、1歲兒子Phi Phi，現再添一個小寶寶，變了一家五口。
(蘋果日報)
