一夜情，原來玩玩吓，真係會成為一生至愛。
陳貝兒主持大台真人騷《嫁到這世界邊端2》，佢嘗盡苦頭，去到土耳其因為捱唔住40幾度高溫中暑入院吊鹽水，不過佢喺土耳其都發掘到一段真愛。
今集主角係港女Ceci，佢02年喺中環老蘭睇世界盃，喺酒吧撞到土耳其老公Serdar，咁啱嗰晚土耳其奪季軍，Ceci喺舞池跳舞時，同Serdar眼神接觸即有火花，跟住佢哋就錫埋同one night stand，仲釣到金龜婿。原來Serdar係土耳其跨國公司高層，佢哋婚禮仲喺土耳其大排筵席，婚禮搞足三日三夜，Ceci風光出嫁。
Serdar婚後被公司派去長駐上海，接管大陸市場，事業更上一層樓，Ceci索性辭工做跟得少奶。以為故事好happy，點知係厄運開始。Ceci話：「老公見到市道興旺便辭職，我哋喺上海開咗一間土耳其手工藝送禮用品店，開頭生意唔錯，後來大陸市道急轉直下，啲人開始唔送禮，我哋生意失敗，最差時要變賣自己嫁妝，我媽媽同親戚送畀我嘅金器去救盤生意，老公極度自責，覺得自己畀唔到好嘅生活一家人，但我覺得我一定要支持我老公，我半句擔心嘅說話都唔敢喺佢面前講，一直鼓勵佢，希望佢重新振作。」
回想最差日子，Ceci話：「最差時，我哋全家人去土耳其投靠奶奶，試過連麵包都冇錢買，要搵全屋嘅散紙湊夠，一齊去買幾個麵包。」經歷過富變窮，Ceci好大啟發：「我人生上咗好寶貴嘅課，以前我比較着重物質，屋企有司機，但係依家，我覺得搭巴士都好開心。以前想畀最好嘅畀小朋友，要送佢哋去私校讀書，依家我乜都唔要，只需要一家人齊齊整整，安全健康便好。」Ceci夫婦係患難見真情，佢哋結婚16年，定居土耳其都5年，育有13歲囡囡Asya同7歲囝囝Esen Khan。呢段人妻故事，貝兒都有所啟發：「結婚係搵老公，唔係搵老闆，唔係每個月有人出糧畀你、畀家用你就會開心，當中一定有愛，互相扶持。」
(蘋果日報)
