日本萬人迷木村拓哉細女木村光希（Koki）獲品牌邀請來港出席活動，母親工藤靜香亦一同前來，今次係人氣爆燈嘅光希出道以來首次襲港，而且係計日本以外，首度於其他亞洲地區出席公開活動，早於上午11時，已有多名保安及工作人員於接機大堂等候，同場仲有幾名男粉絲。
直至下午12時45分，光希率先獨自現身，打扮型格的她大晒木村最強基因，靚得來亦好親民，密密向記者揮手，前往停車場期間，她以英語跟工作人員溝通。
問到是否首次來港？光希友善回答：「Yes, the first time.」相隔幾分鐘，「星媽」工藤靜香再步出大堂，平日Cool爆的她來到香港不但有笑容，更Nice到盡停下腳步為男粉絲簽名及合照。而她前往停車場期間，見到記者跟隨，亦以英語叮囑記者小心，最後登上黑色七人車離開。
抵柴灣拍嘢
光希和工藤靜香乘坐黑色七人車抵達柴灣工業邨一幢工廈，擾攘大約5分鐘，兩母女繼續前後腳，光希先下車，由保安及工作人員護航乘搭𨋢，而工藤靜香隨後，兩女全程笑容滿面，表現親民。
(on.cc東網)
