劉心悠、石詠莉同陳志雲等今日在跑馬地出席健康運動，心悠平日以跑步打網球為主，近日重點加插練習芭蕾舞，佢話：「12月會同香港芭蕾舞團合作，演出胡桃夾子其中角色，好大挑戰，集中練習緊腳步，希望爭氣啲。面對其他人跳咗廿幾年舞，我企埋去唔知似乜呢？」
心悠暫時練習基本動作，但有時雙腳就唔聽話，並有感跳芭蕾舞係一項好強勁嘅運動，仲要考耐力，現時每日最少花兩小時學習，包括踢腿及一字馬動作，要令髖關節更靈活，心悠會做足基本功夫，覺得年齡唔係障礙：「當然小朋友學快上手，我只諗點樣做好件事，喺舞台表演芭蕾舞係人生願望之一，依家心想未成事，希望成功。」為咗籌備今次演出，心悠推了唔少工作，話會搏命去做，一生人一次，仲講笑：「有信心就會請大家嚟睇，冇信心就唔好嚟睇喇。」
石詠莉靠運動增進身體機能，早前身體弱，試過在街感到天旋地轉，仲誤以為有喜，依家好著重健康，佢話：「我身邊嗰位（老公鄧健泓）開始年紀大，要對身體愛錫多啲，佢最近驗出血液膽固醇過高，已經好努力運動改善，但未合格，我要落足心機研究菜式，平時食得好嘢太多。」又話要照顧老公飲食多咗個「大細路」，希望大家都身體好。
兩公婆身體都有小毛病，但石詠莉好堅定表示冇阻礙造人大計，仲話：「佢好勁㗎，好識做人，唔知你哋講邊方面？」講緊生仔？佢話：「OK㗎，佢好健康，唔使擔心，佢身體好過我。」
(蘋果日報)
