藝人岑麗香以性感低胸裝出席代言活動，她指事前未有給老公強強過目，不諱言以往更性感亦沒問題，故無須每次問准老公，她謂：「平均乖就得，上上落落係應該嘅。 」問到平日可有為老公按摩？她得戚表示喜歡在對方做完運動，肌肉特別酸痛時就會效勞，強強也會為她按摩膊頭，那是否二人生活情趣？她謂：「咁又唔係，係需要咋！」
剛從加拿大小休返港的她，透露近日香港與加拿大也很多朋友結婚。
對於好姊妹苟芸慧亦將於本周五（19日）結婚，身為姊妹團的香香表示會隨時候命， 問到是否取消玩新郎環節？她謂：「佢講啫！我諗少少都會有，最緊要氣氛，同埋有個好的記憶。（新郎哥話已經收賣咗班姊妹？）冇收賣我喎！（到時姊妹團有冇表演送畀一對新人？）之前食飯有商量過，但未定。」
至於另一好姊妹鍾嘉欣會否返港？她謂尚不知情，更指今次於加拿大之行也未有機會探望嘉欣的細仔。
問到若果見完會否更想生仔？她謂：「順其自然啦！做Auntie都好開心，玩人哋個B又唔使負責任嘅！」
(on.cc東網)
