TVB著名監製潘嘉德昨日舉行榮休宴兼預祝下月70歲大壽，好多圈中藝人都有出席，亦令唔少經典組合重聚(相關新聞：https://goo.gl/1bD4ov)。其中楊怡同羅仲謙夫妻檔現身。
問到佢哋點樣賀德哥，羅仲謙就話：「乜都有啦，心意啦，同埋最緊要個人嚟支持。」楊怡就話：「今日嘅心意係慈善作用，因為佢都講到明酒水、禮物，乜都唔好買喇，人情方面做幾多都冇所謂，都係作慈善用途。」
被問到同德哥有冇好難忘合作，羅仲謙即時表示係同楊怡訂情作嘅《On Call 36小時》，羅仲謙：「係呀，《On Call》攞咗好多獎，又可以贏埋老婆啦，幾着數呀！（媒人，咁要送多啲嘢俾德哥。）契爺嚟o架。」而楊怡即搭咀話：「老竇嚟o架！叫咗幾十年。」羅仲謙又補充：「其實新人最緊要機會，佢最鍾意俾咗好多機會新人，俾咗好角色我哋，令我哋發展比較順利。」而楊怡即話：「係，呢個係事實嚟，因為我喺訓練班出嚟之後，好多角色都係德哥嘅劇嗰度嚟，佢真條好提攜新人。」
問到楊怡，同德哥合作邊套劇覺得難忘時，佢就話：「哇！太多喇！」然後羅仲謙又搭咀：「梗係《On Call》啦！」跟住楊怡話：「《On Call》難忘，（你可以識到羅仲謙。）呢個係人生不忘磨滅嘅事實，但拍德哥嘅劇，我最有印象都係《再生緣》，因為係啱啱出嚟嘅角色，亦係去內地拍，係一套好開心、好多回憶嘅劇集，所以呢套係好難忘。」
至於問到佢哋造人大計，佢倆個就話：「俾啲時間我哋先，唔好俾壓力。」
不過羅仲謙之後就喺社交網上載咗一張合照，相中見佢扁晒嘴，似乎好唔開心咁喎。
其實係因為相中唔止有佢哋兩公婆，仲有同楊怡喺《on call 36小時》系列飾演兩公婆嘅馬國明。同兩個「老公」合照，楊怡竟然黐近馬國明多過謙謙，難怪「真．老公」嬲爆爆，仲留言：「你們旁若無人，叫我情何以堪呢」
(on.cc東網)
