孖細女現身銅鑼灣，「佢真人幾靚女，keep得幾好，兩母女去買外賣，細女似爸爸多啲，手腳都好瘦，好白淨，腳毛都冇一條，化咗少少妝，一啲都唔似師奶。」
47歲劉小慧跟蘇志威結婚21年，19歲大女君蕎長得亭亭玉立，11歲細女靖珺依然好黐媽咪，20年多前曾經係寶麗金小花嘅小慧，近年升呢做馬主夫人後，通常喺馬場見到佢嘅蹤影，不過，日前小慧孖細女現身銅鑼灣，被讀者凌小姐透過「爆相爆片」分享。
平日以斯文look現身馬場嘅小慧，做回媽咪身份嘅佢原來打扮好young，着白色tee襯紅色短褲騷長腿，讀者在電話表示：「嗰日傍晚近6點，見到佢好熟口面，睇真啲原來係劉小慧，佢真人幾靚女，keep得幾好，兩母女去買外賣，細女似爸爸多啲，手腳都好瘦，而小慧好白淨，腳毛都冇一條，化咗少少妝，一啲都唔似師奶。」
30年前入行拍廣告嘅小慧，對於被讀者讚至今依然靚女唔似師奶，小慧接受《蘋果》電話訪問說：「咁多謝呀讀者，Thank you，我一直有養生，又學緊中醫，當然keep得比較好啲，我一年會辟穀一次，我呢個辟穀係黃帝內經，我師傅係中醫師，佢一直帶住我辟穀，唔係就咁唔食嘢，中間仲要做一啲『動工』，朝早吸太陽，下午行山，五日都唔食嘢，只係飲水同吸太陽精華，一年做一次辟穀，我覺得對身體好好。」
之前蘇志威曾透露大女到日本深造學整甜品，最近日本天災連連，問到大女是否身在日本？小慧說：「大女嚟緊下個月先去日本大阪讀書，我哋8月20幾號過去日本搵樓，啱啱去到風和日麗，走咗就打風，o依家打完風冇事啦，我本來諗住喺大阪買樓，但諗下放番出去好煩，租畀人又好煩，索性租樓算啦。」
(蘋果日報)
