台灣女星徐熙媛（大S）一向對自己身材好有要求，最近接受訪問時，就自揭懷孕血淚史！
最近大S就接受咗一個大陸雜誌嘅訪問，而呢個自傳式嘅訪問仲深入到不得了，除咗睇到佢係一個極度貪靚、完美主義外，為咗個「瘦」字無所不用其極，真係睇見都戥佢辛苦。
訪問中，大S透露，節食，係因為香港藝人。佢見到啲香港女星為咗Keep住身材，只係食少少，就係咁影響咗佢。為咗上鏡好睇，大S要求自己體重長期維持係42kg（即92磅），曾經有段時間，大S佢每日都只係食一餐，而呢一餐就只得雞蛋同豆漿，真係頂唔順喇，佢先會食少少醃菜同白飯。呢段睇到都覺得可憐嘅日子，直到同2010年同汪小菲結婚後先至有改變，因為要養好身體生仔，佢由一碗雞湯開始，打破咗15年來淨食「素」嘅飲食習慣，而且仲要打催卵針同減工嚟改變荷爾蒙。
結果最後順利有咗BB，不過當時嘅大S，就連想食過冬甩都要懷疑自己，打電話問細妹小S（徐熙娣）係唔係正常，當小S話「懷孕就是要大吃」嘅時候，大S最高峰嘅時候就係一次可食五個冬甩、瞓前又要食雪糕，就連大S都要自嘲當時嘅自己好似一隻海狗，而老公汪小菲更表示大S就快生嘅時候，連梳化都落唔到，可見由48kg變成海狗嘅大S，前、後真係好大對比。搞到老公都嚇親，但嗰時大S完全唔擔心，以為可以同以前一樣想瘦就瘦，點知生完第一胎佢徹底崩潰，因為體重仍然同產前一樣係72公斤（約158磅）！
訪問中，又提到汪小菲好懷念8年前自己喺北京認識了咗「很漂亮、瘦瘦的、無憂無慮」嘅大S，但可惜佢最煩嘅事，就係肥咗後嘅大S，可以因為身材問題而唔出門，事關汪小菲話大S有咗後，只成功逼到佢出門一次，點知就俾人偷影，結果大S自此足不出戶，直到產後修身成功。
至於到生第二胎，大S就因為生產過程中突發癲癇，搞到差啲冇命，不過體重就由68kg跌到落58kg，不過佢之後亦有繼續努力減肥，原因就係大S話如果自己瘦唔到，就唔會有導演搵佢拍戲，而老公汪小菲為咗鼓勵佢，仲不時喺微博出post讚佢瘦。
除咗外型要完美外，工作上大S都一樣需要完美，除咗會問清楚工作現場鏡頭擺位、細節外，當知道因為自己對兜風耳而錯過演《還珠格格》嗰陣，大S更誇張到竟然考慮去形容。而該段訪問中，又提到當年同拍《流星花園》同《倩女幽魂》嘅大S，因為受唔住同時演人又做鬼，走去搵《倩》編劇陳十三認錯，以自己酬勞嘅一半價錢，希望求佢寫自己嘅戲份少啲，又或者係快啲喺劇情上寫死自己。
《流星花園》中嘅杉菜，令大S徐熙媛爆紅
如今生完兩個小孩嘅大S，對於體重已逐漸看淡，以前沖完涼會睇勻全身，Check吓邊度需要多啲肌同少啲肉等等，依家沖完會立即着衫同唔照鏡。雖然有3個磅重機，但佢坦言好耐都冇磅過！
(綜合報道 / on.cc / apple daily)
