37嵗名模熊黛林於4月生完孖女，仲親自報喜。
產後不時喺社交網同大家分享湊女趣事。
最吸Like暫時就係以下呢條片，真係盡得名模媽咪真傳，又靚女又可愛！
性感打扮熊黛林（Lynn）琴日產後首現身，到金鐘出席珠寶活動。啱啱生日嘅Lynn，原來噚日凌晨先同老公郭可頌落機，Lynn話呢次係久違嘅二人世界，對上一次已經係去年11月。咁落機後點慶祝呢？Lynn話落機後仲攰攰哋，所以冇周圍去：「喺屋企度切蛋糕，同埋兩個小朋友仲細，唔可以走圍去。」
咁耐冇二人世界，少不免都會好奇，係咪造人呀？Lynn即答湊兩個都搞得掂，但見少陣已經心掛掛：「朝朝起身都叫媽咪視像，喺飛機睇佢哋相，第一次分開幾日，之前試過只係分開一晚，都好掛住佢哋，開始明白點解啲朋友話唔捨得。」
問到幾時ready再生，最大原因係－－減肥，佢話：「隨緣啦，好多手尾，要減肥，自己要求高仲未減晒。生個時好恐怖，肥咗50幾磅，依家都唔敢上磅，不過減30磅就一定有。」Lynn少許灰心表示：「真係好大打擊，比model着衫大一個碼。腰位OK，上身就大咗一個碼。」但佢話已經停咗餵人奶，又聽講餵人奶會瘦係因為捱夜。
Lynn孖女Kaylor同Lyvia已經半歲，老公有冇話要追個仔？
Lynn嘻嘻笑答：「有個仔都好，兩個女半歲，越來越好玩，依家兩個似爸爸，開頭家姐似我，依家得番對眼似我，囡囡就好肥好得意，湊佢哋好辛苦，佢哋未自己識坐同行，抱佢哋好辛苦，隻手未好番，辛苦過舉啞鈴。」有傳城城都就嚟再做老竇，Lynn簡單答：「如果係真就恭喜晒。」
（綜合報道 / on.cc / apple daily）
