藝人鄧麗欣（Stephy）出席慈善活動，一臉攰容的她坦言這次去了歐洲半個月，亦是她第一次身在歐洲工作而想回香港，因她半個月去了米蘭、威尼斯、佛羅倫斯及巴黎。
問到是否有男友邱勝翊（王子）同行照顧，無論幾攰都開心？她表示：「我真係去做嘢㗎！係最尾一站巴黎先至見到佢。（專登留喺巴黎咁浪漫地方先至見，你哋去食燭光晚餐？）咁巴黎本身都浪漫，唔使再做啲乜嘢，同埋都係行吓街囉！今次仲畀人偷電話，不過都冇影響心情，但就幾驚險，因為第1次見住個賊同自己講嘢，跟住就唔見電話，其實自己都一直打醒12分精神知危險，但因為坐喺餐廳內食嘢，諗住安全可以relax啲，點知有個人行埋嚟同我講嘢，講完枱上面電話就唔見咗。」問到同王子失聯，是否好心急？她笑言：「咪問助手借電話囉！」
講到有指她帶挈王子升呢，到巴黎以情侶檔出席國際品牌活動，對此她表示：「邊係我帶佢去？唔係啦！（你哋以情侶檔出現？）本身我哋都唔係一齊傾，佢一早要去巴黎出席活動，而我公司亦有傾去巴黎，至於一齊出席，係因為大家去到當地都獲邀請，亦唔係一個好正式活動嚟。」
本月15日便是Stephy的35歲生辰，亦是王子首次陪她過生日，問到對方可會送驚喜？她笑言：「知道就唔係驚喜。」她又謂今年會在台灣過生日，因其飲品店將於14號在台灣開張。有傳她與王子在當地同居，她回應：「冇呀！（你去台灣使唔使訂酒店？）又問呢啲！（住男友度就唔亂使錢。）你知我慳家嘅！（住埋一齊咪同居囉？）我唔係嗰種，係收留啫！（到時王子嚟香港，你又收留佢？）係呀，幾日唔係叫收留叫咩？」
(on.cc東網)
